खामगाव- बुलढाणा जिल्हा सामान्य रुग्णालयात तपासणी करण्यासाठी आलेल्या गर्भवती महिलेची सोनोग्राफी केल्यानंतर तिच्या पोटातील बाळाच्या पोटात बाळ असल्याचा धक्कादायक प्रकार समोर आला आहे. या महिलेचं वय 32 वर्ष असून तिला याआधी दोन अपत्यं आहेत. हे एक अत्यंत दुर्मीळ प्रकरण असून या गर्भधारणेला मेडिकल भाषेत ’फिटस इन फिटू’ असे म्हणतात.
साधारणपणे 5 लाख गर्भवती महिलांमध्ये अशी एखादी केस आढळत्ो. जगात अशी घटना 1983 मध्ये पहिल्यांदा नोंदवली गेली. त्यानंतर आतापर्यंत जागतिक स्तरावर सुद्धा 200 पेक्षा कमी केसेस अर्भकामध्ये अर्भक असल्याच्या घडल्या आहेत. सदर महिलेला प्रसुतीसाठी संभाजीनगरला पाठविले आहे ही महिला घाटाखालील रहिवासी असून नियमित नऊ तपासणीसाठी बुलढाणा जिल्हा सामान्य रुग्णालयात आली होती. दरम्यान स्त्रीरोग तज्ञ डॉ.प्रसाद अग्रवाल यांनी सदर महिलेची सोनोग्राफी करताना भुवया उंचावल्या, त्यांनी परत परत तपासणी केली आणि मग त्यांना कळून चुकले की, आईच्या पोटात बाळ आहेच पण बाळाच्या पोटातही बाळ आहे. त्यांनी तातडीने ही बाब जिल्हा शल्यचिकित्सक डॉ. भागवत भुसारी, शासकीय वैद्यकीय महाविद्यालयाचे अधिष्ठाता डॉ. झिने व स्त्री रुग्णालयाचे वैद्यकीय अधीक्षक डॉ. पाटील यांच्या कानावर टाकली. सदर वरिष्ठांच्या मार्गदर्शनात पुन्हा सोनोग्राफी करण्यात आली. बाळाच्या पोटात बाळ स्पष्टपणे दिसत होत्ो. कुठलाही धोका न पत्करता सदर महिलेची प्रसुती सुलभ होण्याकरीता आणि पोटातील बाळ वाचावे यासाठी तिला छत्रपती संभाजी नगर या ठिकाणी हलविण्यात आले आहे.
